Site: Angedalen

Stadnamn i Angedalen.

Vi vil pusse støvet av dei gamle namna – finne dei fram – arbeide med dei - gje dei eit andlet.

Dette prosjektet har som hovudmål å ta vare på dei gamle namna rundt om på gardane, i utmarka og på fjellet som før var i dagleg bruk.
Vi vil gjere stadnamnmaterialet i nærmiljøet vårt betre tilgjengeleg for både born og vaksne. Det spesielle med dette prosjektet, er at vi nyttar fotografi i tillegg til og i staden for kart og at det er eit samarbeidsprosjekt der unge og eldre – skule og heim – grend og kommune – fylkesarkiv og førstehands brukar er hovudaktørar.
Bakgrunn.

Dei gamle stadnamna blir mindre og mindre brukte. Mange av dei eldre som sit inne med kunnskapar om namna,- plassering, bakgrunn og historier knytte til namna, er gått bort. Det hastar med å få henta førstehands opplysningar før det vert for seint.

Skulen og Grendalaget er samde om at det er ”for gale” at så mykje spennande lokalhistorie skal ligge vanskeleg tilgjengeleg på namnelister og grå kopiar av økonomisk kartverk. Det er ikkje lett for vaksne å finne fram på slike kart. For dei unge er det umogleg. Dette er sjølve bakgrunnen for, og ideen med å bruke store fotografi i stadnamnarbeidet.