Site: Stamnesfjellet

Stamnesfjellet er eit utmarksområde ved Osterfjorden og ligg på eit høgdedrag nord for Stamnes, avgrensa av Hesjedalen og Vikadalen mot aust. I sør og vest ligg området i overkant av bratte fjellsider. Oppe på fjellet på om lag 200-300 m høgde, flatar terrenget seg ut i. På tvers av området går det ein dal, Stamnesdalen. På begge sider av dalen er det småkupert terreng med mindre åsar og høgdedrag. Høgste punkt på Stamnesfjellet er Middagshaugen 333 m o h. I hovudtrekk skrånar terrenget mot nord og aust. Mot vest er det tildels stupbratt ned mot Osterfjorden. Berggrunnen består av gneiser noko som gir eit næringsfattig grunnlag for vegetasjonen.
I tidlegare tider vart området nytta som beitemark for gardane på Stamnes og Kaland. Det har vore drift ved stølar i området: Kalandsstølen og Skreddarstølen. I dag er Stamnesfjellet nytta til turområde og til hjortejakt om hausten.