Show results

Eigar: Eirik Riisnes. Gåve til Masfjorden kommune i 1993 Står utstilt i Båt- og sjøbrukssamlinga til Masfjorden kommune Ferja vert lokalt kalla for hestaferjo, og ho vart mellom anna brukt til å føra hestar over Risnessundet før det kom bru. Ferja vart og nytta til å føra ved med og høyrde til på garden til Eirik Riisnes. (Erik A. Risnes (1890-1935)?) Ferja skal vera bygd rundt 1900 og hovudansvarleg for byggverket var Johan Dragøy i fylgje Olav Sleire. I alt er det 12 botnband i ferja, 6 er heile band og 6 er skøytte. Dei to bækkane er plassert over banda i ro-rommet. Bækkane er pryda med pyntestrekar slik ein ser det i dei gamle masfjordbåtane. Den kvistfrie og fine veden i bækkleisten kan tyda på at emnet er henta frå rot og stamme. Det er sjeldan det vert brukt band i botn ved gavlane. Det er brukt eit kraftig band i bakgavlen, sikkert fordi ferja er såpass stor. Bandet er skøytt saman av tre delar. Me ser også at bakgavlen er sett saman av eit breitt bord nederst og eit smalare på toppen. Av dei små understøttarane (listene) som ligg inntil bandet på nest øveste bordgangen forstår ein at dei kunne leggja ei tofte bak i gavlen. Oppe i hjørnet framme i gavlen er det sett inn små kne som skal binda gavlen og øvste bordgangen saman. Desse vinklane kan også ha vore brukt som handtak når ferja skulle dragast inn og ut or naustet. Dei fem bordgangane i ferja er bygd opp på eit overliggjande kjølbord. Slitelistene er spikra langs etter sua mellom kjølbordet og fyrste bordgangen. Dei to tollegangane er festa på innsida av øvste bordgang og laga av eik. Det er sett på ei ekstra fjøl/foring mellom keipen og øvste bordet for at keipfestet skulle vera stødig. Tollegangen er festa med to trenaglar som er kilt i enden. Det ser også ut som det er slått inn to spikrar for å styrkja festet av tollegangen. Det kan vera gjort seinare. Det ser ut til å vera brukt eik som emne til tollegang. Opplysningar og oppmåling av ferja : Bygd ca 1900 Bygd av Johan Dragøy og Kristoffer L Tangedal Lengde : 603 cm Breidde oppe på midten : 182 cm Gavel framme og bak Klinkbygd botn og sider 3 rom utanom fram- og bakrom 6 heile botnband 6 skøytte botnaband Skøytt band i bakgavelen 2 bækkar 2 bord i framgavel 2 bord i bakgavel Kneforsterka framgavel Forsterka bakgavel med eige band Bygd på overliggjande kjølbord. To slitelister under kjølbordet 5 Bordgangar Ikkje æsing 2 Tollegangar på innsida av øvste bordgangen Ekstra foring på innsida av keipen i ro-rommet
(07.05.2022)