Hopp til hovedinnhold

Lærarrettleiing

Språkforskarar veit mykje om kva språk og dialektar er, men ikkje så mykje om korleis dei blir brukt. I Forskingskampanjen 2014 skal elevar på alle trinn delta i ein nasjonal forskingsdugnad for å kartleggje bruken av språk og dialektar i Noreg.

I årets forskingskampanje kan elevane mellom anna:

  • undersøkje kva ord elevar i heile landet brukar som dei meiner at vaksne ikkje kan
  • finne ut om elevar brukar forskjellige ord på ulike stader i landet
  • sjekke kva ord som er mest populære
  • undersøkje om det til dømes er slik at eldre elevar brukar andre ord enn yngre elevar
  • finne ut om gutar likar eller brukar andre ord enn jenter
  • sjekke kva som er andre elevars favorittord
  • undersøkje kva ord betyr
  • finne ut kva engelske ord som er populære på ulike stader i landet
  • undersøkje om det til dømes er slik at jenter er meir positive enn gutar til bruk av engelsk i norsk – eller omvendt
  • finne ut korleis andre elevar skriv ord som kjem frå engelsk
  • lytte til andre elevars språkprøver og finne fellestrekk og skilnader i måtar å snakke på ulike stader i landet
  • undersøkje kor mange språk og dialektar som er representerte i klassen og på andre skolar i Noreg
  • finne ut kva språk elevane ønskjer å lære seg og kvifor dei ønskjer å lære språk
    få innsikt i kva forsking er

Ved å delta i Forskingskampanjen får elevane bidra til eit reelt forskingsprosjekt der dataa dei samlar inn blir brukt vidare i forsking. Årets tema gir òg ei unik moglegheit til å utforske problemstillingar i språk- og samfunnsfag som ein kan setje i samband med elevane sine eigne språkerfaringar. Kampanjen gir elevane kunnskapar om språk og språkleg variasjon. Den aukar bevisstheita om eigen språkbruk og kan gi grunnlag for refleksjonar og samtalar om tilhøvet mellom språk og identitet, språk og geografisk variasjon og om kva haldningar ein har til ulike språklege uttrykksmåtar. Den gir kunnskap om språkendring og om språkleg mangfald i dagens fleirkulturelle samfunn. Medvit om språket i bruk gir også eit godt grunnlag for vidare arbeid med språk både i norskfaget og andre fag.

Undersøkinga består av tre delar, der den tredje er valfri.

1. Elevane registrerer data om eigen språkbruk i nettskjemaet.
2. Elevane intervjuar andre unge. Intervjuskjemaet kan ein laste ned som PDF, skrive ut og så skriv elevane på skjemaet før registrering same stad som i del 1.
3. Valfri del: Elevane tek opp ei kort lydprøve på mobiltelefon og lastar opp.
Resultata som elevane legg inn blir tilgjengelege for alle. Dermed kan elevane samanlikne sine funn med andre sine og finne svar på eigne problemstillingar ved å analysere rådata.

Før elevane byrjar med undersøkinga:

  • Snakk med elevane om kva språk og dialektar er.
  • La elevane komme med døme på ord og uttrykk som dei meiner at vaksne ikkje kan.
  • Gjennomgå kva elevane skal gjere utan å presentere nettskjemaet og dei enkelte spørsmåla.
  • Understrek at det ikkje finst eit “fasitsvar”.
  • Elevane skal ikkje tenkje på rettskrivingsreglar når dei fyllar ut skjemaet.
  • Undersøkinga krev tilgang til datamaskin. Det er ein fordel at desse er sett opp på førehand.
  • Dersom klassen ønskjer å gjennomføre den valfrie delen, må elevane på førehand få beskjed om å ta med mobiltelefon.
  • Det er ein fordel at læraren på førehand har gjort seg kjend med nettskjemaet ved sjølv å fylle det ut.

Sjølve undersøkinga

Registreringa skjer på nettsidene. Læraren loggar inn, vel “Elevkoder” i menyen til venstre og opprettar ein elevkode som elevane så brukar for å logge inn.

Del 1: Elevane svarar sjølv

Elevane gjennomfører den første delen av undersøkinga (nettskjemaet) individuelt.

Del 2: Elevane intervjuar kvarandre

Elevane intervjuar i grupper på fortrinnsvis to, eventuelt tre, elevar. Elevane intervjuar to eller tre andre elevar på skolen. Intervju ein om gongen. Bruk eitt skjema for kvar elev som blir intervjua. Elevane registrerer resultata frå intervjua i det same nettskjemaet som i den fyrste delen.

Del 3: Dialektprøver

Valfritt: Elevane brukar mobiltelefonen og tek opp svar på spørsmålet “Kva har vi i lekse til i morgon?” Lydprøva blir lasta opp og lagt inn på nettsidene.

Etter undersøkinga

Miljolare.no gir eit godt utgangspunkt for å arbeide vidare med språk og språkbruk i klassen. Her kan elevane samanlikne eigne resultat med andre sine, og til dømes finne ut om det er variasjon knytt til geografi, alder og kjønn. Det er utarbeidd forslag til andre aktivitetar som ein kan gjere i samband med Forskingskampanjen, sjå forslag til undervisningsopplegg.
Forskarane ved MultiLing Senter for fleirspråklegheit, Universitetet i Oslo, utarbeider ein rapport basert på undersøkingane til elevane. Denne blir gjort offentleg ved årsskiftet.

Om Forskingskampanjen

Forskingskampanjen blir arrangert kvar haust i samband med Forskingsdagane og er eit samarbeid mellom Forskingsrådet, Nettverk for miljølære (Universitetet i Bergen) og eit forskingsmiljø. Årets forskingsmiljø er MultiLing Senter for fleirspråklegheit ved Universitetet i Oslo.